धादिङको गल्छी गाउँपालिका–४ मास्टारस्थित पृथ्वी लोकमार्गमा आइतबार साँझ बोलेरोको ठक्करबाट एक वृद्धको ज्यान गएको छ।
आइतबार साँझ करिब ६ बजे काठमाडौंबाट गजुरीतर्फ जाँदै गरेको बा.प्र. ०१–०२७ च. ०३४० नम्बरको बोलेरोले स्थानीय ७० वर्षीय यज्ञराज अधिकारीलाई ठक्कर दिँदा गम्भीर घाइते भएका थिए। उनलाई उपचारका लागि तत्काल प्राथमिक स्वास्थ्य केन्द्र गजुरी पुर्याइए पनि चिकित्सकले साँझ ६:४८ बजे मृत घोषित गरेका हुन्।
दुर्घटनापछि बोलेरो र चालकलाई प्रहरीले नियन्त्रणमा लिएको छ। घटनास्थलमा इलाका प्रहरी कार्यालय गजुरीका प्रमुख प्रहरी निरीक्षक बलराम श्रेष्ठको कमाण्डमा १५ जनाको प्रहरी टोली खटिएको थियो।
प्रहरीले घटनाको थप अनुसन्धान भइरहेको जनाएको छ।
