लायन्स क्लब धादिङ नीलकण्ठको तिन दिने हस्तलेखन प्रशिक्षण सम्पन्न ।
शिक्षा क्षेत्रमा सशक्त भूमिका निर्वाह गर्दै आइरहेको लायन्स क्लब अफ धादिङ नीलकण्ठको आयोजनामा तथा पशुपति माध्यमिक विद्यालय, नीलकण्ठ–१२, धादिङको व्यवस्थापनमा तीन दिनसम्म सञ्चालन गरिएको हस्तलेखन तालिम सम्पन्न भएको छ ।

असार ११ गते देखि पशुपति माध्यमीक विद्यालयमा सञ्चालित प्रशिक्षण आज एक कार्यक्रमका विच सम्पन्न भएको हो ।
क्लवका अध्यक्ष नाराणकुमार श्रेष्ठको अध्यक्षतामा सम्पन्न कार्यक्रममा वडा नंवर १२ का अध्यक्ष धर्मराज भण्डारीको प्रमुख आतिथ्यता रहेको थियो ।

प्रमुख अतिथि भण्डारीले यस्ता कार्यक्रमहरूले स्थानीय तहमा शिक्षा सुधारमा सकारात्मक असर पार्ने बताउँदै लायन्स क्लबको क्रियाशीलता र प्रतिबद्धतालाई धन्यवाद दिनुभयो । “स्थानीय विद्यालयमा यति महत्त्वपूर्ण तालिम सञ्चालन गर्नु क्लबको सामाजिक उत्तरदायित्वप्रति जागरूकता र शिक्षा प्रतिको समर्पणको स्पष्ट उदाहरण हो,” उहाँले भन्नुभयो । शिक्षाको क्षेत्रमा काम गरीरहेको क्लवले पशुपति माध्यमिक विद्यालय छनौट गरेको मा अध्यक्ष भण्डारीले क्लवको खुलेर प्रशंसा गर्नुभयो ।

यता विद्यालयका प्रधानाध्यापक नारायण भण्डारीले क्लबप्रति आभार व्यक्त गर्दै भन्नुभयो “शिक्षा क्षेत्रमा टेवा र्पुयाउने यस्ता कार्यक्रमले विद्यालयलाई मात्र होइन, विद्यार्थीको भविष्यलाई दिशा दिन्छ। क्लबले यो कार्यक्रम विद्यालयलाई दिएर हाम्रो शैक्षिक यात्रामा साथ दिएको छ, जुन हामीलाई सदैव सम्झना रहनेछ ।”
बक्ताका रुपमा सम्बोधन गर्दै लायन ईश्वर कुमार श्रेष्ठ, जो स्वयं शिक्षा क्षेत्रमा लामो समयदेखि क्रियाशील रहनु भएको छ, उहाँले हस्तलेखनजस्तो आधारभूत तर महत्त्वपूर्ण पक्षप्रति ध्यान दिनु अत्यावश्यक रहेको बताउनुभयो। उहाले यस तालिमले विद्यार्थीमा अनुशासन, ध्यान केन्द्रित गर्ने क्षमता र शैक्षीक गुणस्थर विकासमा सहयोग गर्ने बताउनु भयो । श्रेष्ठले क्लब र विद्यालयबीचको सहकार्यलाई “सकारात्मक शिक्षाशैलीको सुरुवात”को संज्ञा समेत दिनुभयो ।

कार्यक्रममा आयोजका तर्फबाट क्लवका उपाध्यक्ष पोषनाथ अधिकारीले स्वागत मन्तव्य राख्दै लायन्स क्लबको उद्देश्य, विश्वव्यापी सेवा अभियान, र समुदायमा शिक्षा, स्वास्थ्य तथा सामाजिक चेतनाका क्षेत्रमा निरन्तर भइरहेको योगदानबारे प्रकाश पार्नुभयो । उहाँले लायन्स क्लब एक अन्तर्राष्ट्रिय सेवा संस्था भएको र हामी सेवा गर्छौं भन्ने मूल मन्त्रका साथ विश्वभर लाखौं स्वयंसेवक मार्फत समाज सेवामा समर्पित रहेको उल्लेख गर्दै नेपालमा पनि यस क्लबको विभिन्न शाखाहरूले शिक्षा, स्वास्थ्य, दृष्टि सुधार, वातावरण संरक्षण, युवा विकास लगायतका क्षेत्रमा उल्लेखनीय काम गर्दै आएको उल्लेख गर्नु भयो । “हामी केवल सेवा गर्दैछौं भन्ने होइन, समाजलाई सकारात्मक दिशातर्फ उन्मुख बनाउने प्रयास गर्दैछौं,” स्वागतका क्रममा उहाले बताउनु भयो ।

विद्यालय प्राङ्गणमा भव्य रूपमा सम्पन्न भएको कार्यक्रममा कार्यक्रमको अध्यक्षता गर्नुभएका क्लबका अध्यक्ष नारायण कुमार श्रेष्ठले यस कार्यक्रमले विद्यार्थीहरूमा लेखाइ सुधारको माध्यमबाट उनीहरूको समग्र शैक्षिक गुणस्तर सुधारमा योगदान र्पुयाउने विश्वास व्यक्त गर्नु भयो ।

यस्ता तालीमहरू शिक्षालाई व्यवहारिक बनाउने, विद्यार्र्थीमा आत्मविश्वास बढाउने र विद्यालयलाई सिर्जनात्मक अभ्यासको थलो बनाउने उत्कृष्ट पहल भएको भन्दै विद्यालयको आग्रहमा थप तिन दिन सम्म प्रशिक्षणलाई निरन्तरता दिन लायन्स क्लब अफ धादिङ नीलकण्ठले सहयोग गर्ने प्रतिवद्धता व्यक्त गर्नुभयो ।
लायन्स क्लव आफ धादिङ नीलकण्ठले विगतदेखि नै रक्तदान, आँखा परीक्षण, शिक्षा सामग्री वितरण, वृक्षारोपण, नेतृत्व विकास तालिमजस्ता विविध कार्यक्रम सञ्चालन गर्दै आएको स्मरण गर्दै हस्तलेखन तालिम त्यही शृङ्खलाको पछिल्लो खुड्किलो भएको बताउनु भयो । उहाले क्लव निरन्तर विद्यालयसँग सहकार्य गर्न लागीपर्ने समेत बताउनु भयो ।

कार्यक्रममा क्लबका सचिव सरणकुमार श्रेष्ठ, सदस्य जीवन श्रेष्ठ, विद्यालयका शिक्षक, कर्मचारी, तथा छात्रछात्राहरूको उपस्थिति थियो ।

 

धादिङको सदरमुकाम धादिङबेसीमा रहेको नीलकण्ठ बहुमुखी क्याम्पसको नवनियुक्त क्याम्पस प्रमुख डा.मुरारी अधिकारीले पदभार ग्रहण गर्नुभएको छ ।

गत बुधबार क्याम्पस प्रमुखमा नियुक्त हुनुभएका डा.अधिकारीले बिहिबार एक कार्यक्रमका बिच पदभार ग्रहण गर्नुभएको हो ।

क्याम्पसका निवर्तमान क्याम्पस प्रमुख नवराज शर्माको दुई कार्यकाल सकिएलगत्तै क्याम्पस सञ्चालक समितिको ११३ औँ बैठकबाट आगामी चारवर्षे कार्यकालका लागि डा.अधिकारीलाई क्याम्पस प्रमुखको जिम्मेवारी तोकिएको हो ।

 

पदभार ग्रहणपछि डा.अधिकारीले नीलकण्ठ क्याम्पसको शैक्षिक गुणस्तर तथा क्याम्पसको गरिमालाई थप उचाइमा पु¥याउने गरी काम गर्ने बताउनुभएको छ ।

उहाँले भन्नुभयो,‘पदले म क्याम्पस प्रमुख हुँ । तर यो नीलकण्ठ बहुमुखी क्याम्पस सबैको साझा संस्था हो । सबैले क्याम्पस प्रमुख सरह महसुस गर्ने गरि काम गर्नेछु’ उनले भने– ‘मेरो शिर भन्दा माथि मेरा गुरुहरु पूर्व क्याम्पस प्रमुखहरु राखेर काम गर्नेछु । सबैको साथले क्याम्पसको गरिमा र उचाई थप हुनेछ । क्याम्पसमा अन्र्तराष्ट्रिय सम्मेलन गर्ने, द्यब् प्रोग्राम सुरु गर्ने, प्रविधिको उच्चतम प्रयोग गरि शैक्षिक सुधार गर्ने लगायतका काम गर्नेछु ।’

 

पदभार ग्रहण कार्यक्रममा नेपाल सरकारका कृषि तथा पशुपंक्षी विकास मन्त्री रामनाथ अधिकारी, क्याम्पसका पूर्व अध्यक्षहरु शम्भुकुमार श्रेष्ठ, भुपेन्द्र कुमार श्रेष्ठ, निवर्तमान अध्यक्ष नवराज शर्मा लगायतले शुभकामना दिदै क्याम्पसलाई थप उचाईमा पुर्याउने विश्वास व्यक्त गरेका छन् ।

डेढ दशक लामो समयदेखि अध्यापन पेसामा निरन्तर सक्रिय रहनुभएका डा. अधिकारी दुई दशकदेखि पत्रकारितामा समेत सक्रिय हुनुहुन्छ ।

प्रेस युनियनका केन्द्रिय उपाध्यक्ष समेत रहनुभएका उहाँ हाल गोरखापत्र दैनिकमा आबद्ध हुनुहुन्छ ।

०५७ मा १२ जना विद्यार्थीबाट सुरु भएको नीलकण्ठ क्याम्पस विश्वविद्यालय अनुदान आयोगबाट गुणस्तर प्रत्यायन प्राप्त गर्ने जिल्लाको पहिलो र एक मात्र क्याम्पस हो ।

हाल स्नातक तथा स्नातकोत्तरसम्मको अध्यापन गराइने नीलकण्ठ क्याम्पसमा करिब एक हजार विद्यार्थी अध्ययनरत छन् ।

धादिङबेशीमा सामुदायिक सुरक्षा जालो कार्यक्रम अन्तर्गत सार्वजनिक सुनुवाइ सम्पन्न भएको छ। फोकस नेपालको आयोजना र नागरिक आवाजको सहकार्यमा कार्यक्रम सम्पन्न भएको हो।

कार्यक्रममा अन्जु श्रेष्ठले हालसम्मका गतिविधि, सिकाइ र उपलब्धिहरू प्रस्तुत गर्दै महिला सशक्तीकरण, सामाजिक सचेतना र समूहहरूको भूमिकाबारे प्रकाश पार्नुभयो।

रेडियो धादिङका स्टेशन म्यानेजर राजाराम शर्माले समूहमा आबद्ध महिलाहरू आत्मनिर्भर बन्दै गएको उल्लेख गर्दै यो परिवर्तन सकारात्मक भएको बताए।

जिल्ला समन्वय समितिका उपप्रमुख कुलमान विश्वकर्माले यस्ता कार्यक्रमले महिलाको आत्मबल बढाएको बताउँदै दिगो निरन्तरतामा सबैको सहयोग आवश्यक रहेको धारणा राख्नुभयो।

सार्वजनिक सुनुवाइमा सहभागी महिलाहरूले समूहमा आबद्ध भएपछि आत्मविश्वास, निर्णय प्रक्रियामा सहभागिता, र घरेलु हिंसाविरुद्ध बोल्ने साहस विकास भएको अनुभव सुनाएका थिए। परियोजनाअन्तर्गत नीलकण्ठ नगरपालिका वडा नं. ४ र बेनिघाट रोराङका २, ८, ९, १० मा २५ वटा समूह गठन गरिएको छ।

धादिङ, असार १९ – माध्यमिक शिक्षा परीक्षा (एसईई) २०८१ मा उच्चतम जिपिए (४.०) ल्याउने विद्यार्थीहरू र शतप्रतिशत नतिजा ल्याउन सफल विद्यालयहरूलाई नीलकण्ठ नगरपालिकाले भव्य सम्मान गरेको छ।

नगरपालिकाले एक विशेष समारोहका बीच नगर क्षेत्रभित्रका निजी तथा सामुदायिक विद्यालयका ५ जना विद्यार्थीलाई जनही ५० हजार रुपैया , सम्मान पत्र र खादासहित सम्मान गरेको हो। सम्मानित हुने विद्यार्थीहरूमा सन्द्या तिमल्सिना – नीलकण्ठ बालमन्दिर माध्यामिक विद्यालय प्रशंसा श्रेष्ठ – सुनौलो भैरवी माध्यामिक विद्यालय,प्रिसिला तामाङ– चिल्ड्रेनपार्क आवासीय माध्यामिक विद्यालय,समिर भण्डारी – न्यू किबो आवासीय बोर्डिङ स्कुल,आयुष शर्मा– न्यू किबो आवासीय बोर्डिङ स्कुलबाट रहेका थिए । 

यसबाहेक, शतप्रतिशत नतिजा ल्याउन सफल ४ वटा विद्यालयलाई पनि जनही ४ लाख रुपैयाँ सहित सम्मान गरिएको छ।  विद्यालयहरूमा प्रकाश माध्यामिक विद्यालय,लामागुरु महादेव माध्यामिक विद्यालय,महेन्द्र माध्यामिक विद्यालय,भैरवी माध्यामिक विद्यालय रहेको थियो  । 

नगरप्रमुख भीम प्रसाद ढुंगानाले कार्यक्रममा बोल्दै भने, “शतप्रतिशत नतिजा ल्याउने प्रतिबद्धता भएको खण्डमा नगरपालिकाले आवश्यक सबै बजेट उपलब्ध गराउन तयार छ। शिक्षामा गरिएको लगानी कहिल्यै खेर जाँदैन।”

उप–प्रमुख दिपक विश्वकर्माले नीलकण्ठ नगरपालिकाले शिक्षा क्षेत्रमा विशेष योजना बनाएर निःशुल्क शिक्षादेखि गुणस्तरीय सुधारका कामहरू गर्दै आएको बताए। उनले थपे, “नगरको लगानीको सकारात्मक प्रतिफल देखिन थालेको छ। अब सहकार्य र संकल्पसहित शिक्षा क्षेत्रमा ठूलो फड्को मार्न सक्छौं।”

धादिङ जिल्लाभर ८ जना विद्यार्थीले ४ जिपिए ल्याएका थिए, जसमा ५ जना नीलकण्ठ नगरपालिकाभित्रका हुन्। यो तथ्यले नीलकण्ठ नगरपालिकाको शैक्षिक लगानी र प्रतिबद्धताको सकारात्मक परिणाम देखाएको छ।

चिल्ड्रेनपार्क आवासीय माध्यमिक विद्यालय, धादिङमा एसईई २०८१ ब्याचका विद्यार्थीहरूलाई लक्षित गर्दै  बधाई तथा सम्मान कार्यक्रम सम्पन्न गरिएको छ।

कार्यक्रमको विशेष आकर्षणको रुपमा ४.० जीपीए ल्याउन सफल प्रिसिला तामाङलाई विद्यालयबाट नगद २०,००० रुपैयाँ र प्रधानाध्यापक षष्टिकुमार श्रेष्ठको व्यक्तिगत तर्फबाट १०,००० रुपैयाँ गरी जम्मा ३०,००० रुपैयाँ नगद पुरस्कारद्वारा सम्मान गरिएको हो ।

कार्यक्रममा विद्यालयबाट एसईई परीक्षा उत्तीर्ण गर्ने सम्पूर्ण विद्यार्थीहरूलाई माला र उपहारसहित सम्मान गरिएको थियो।  प्रकाशित नतिजामा २० जना विद्यार्थीले ३.६ देखि ४.० जीपीए, २० जनाले ३.२० देखि ३.६० जीपीए र ५ जनाले २.८० देखि ३.२० जीपीए ल्याउन सफल भएको जनाएको छ।

उक्त अवसरमा विद्यालयले उत्कृष्ट विषय शिक्षकहरूलाई सम्मानपत्र प्रदान गर्दै कदर व्यक्त गरेको थियो। साथै, विद्यालयमा लामो समय सेवा पुर्याएका दुईजना शिक्षकलाई सम्मानसहित बिदाई पनि गरिएको थियो।

विद्यालय व्यवस्थापन समितिका अध्यक्ष विनोदमान श्रेष्ठको अध्यक्षतामा सम्पन्न कार्यक्रममा शिक्षा विकास तथा समन्वय इकाई धादिङका प्रमुख भमीलाल शर्मा सुवेदी प्रमुख अतिथि थिए। कार्यक्रममा शिक्षक, अभिभावक, विद्यार्थी तथा स्थानिय समाजका अगुवाहरूको उल्लेखनीय उपस्थिति रहेको थियो।

त्रिपुरासुन्दरी गाउँपालिकाको आयोजनामा बालविवाहविरुद्ध जनचेतना जगाउने उद्देश्यले तयार पारिएको सडक नाटक “छोरीको सस्तो मूल्य”  बुधबार विशेष प्रदर्शन सम्पन्न भएको छ।

स्काई फोटो फिल्मस्  एण्ड मिडिया हाउसका कलाकारहरूको सक्रिय सहभागितामा प्रस्तुत गरिएको नाटकले बालविवाहका कारण उत्पन्न सामाजिक, मानसिक र शारीरिक समस्यालाई प्रभावशाली ढंगले उजागर गरेको थियो ।

नाटकले विशेष गरी छोरीहरूलाई वस्तु सरह किनबेच गर्ने मानसिकता र सामाजिक दबाबका कारण उनीहरूको शिक्षा, स्वास्थ्य र भविष्य कसरी प्रभावित हुन्छ भन्ने विषयमा दर्शकहरूलाई गहिरो सन्देश दिएको थियो ।

कार्यक्रममा बोल्दै गाउँपालिका उपाध्यक्ष देवराज धरेलले भने, “बालविवाह एक घातक सामाजिक विकृति हो। हामीले यसको अन्त्यका लागि शिक्षा, सशक्तिकरण र चेतनामूलक कार्यक्रमलाई प्राथमिकतामा राख्नुपर्छ।”

उक्त नाटक त्रिपुरासुन्दरी गाउँपालिका वडा नं. १ र २ स्थित  विद्यालयहरुमा प्रस्तुत गरिएको थियो। स्थानीय बासिन्दा, शिक्षक, अभिभावक तथा विद्यार्थीहरूले उत्साहपूर्वक नाटकको अवलोकन गरेका थिए।

नाटकमा  मनिष श्रेष्ठ ,बिनोद तमु, रवि भट्टराई, प्रतिमा अर्याल, सम्झना तामाङ ,मञ्जु विश्वकर्माले अभिनय गरेका थिए ।

त्रिपुरासुन्दरी गाउँपालिकाले आगामी दिनमा पनि यस्ता कार्यक्रम निरन्तर सञ्चालन गर्ने प्रतिबद्धता जनाएको छ।

ज्वालामुखी गाउँपालिकाले आगामी आर्थिक वर्ष २०८२/८३ का लागि नीति तथा कार्यक्रम र बजेट सार्वजनिक गरेको छ । आईतबार गाउँसभाको १५ औं अधिवेशनले नीति तथा कार्यक्रम र बजेट सार्वजनिक सर्वसम्मतले पारित गरेको छ।

गाउँसभामा गाउँपालिका अध्यक्ष यामनाथ दनैले आगामी आर्थिक बर्ष २०८२/०८३ को नीति तथा कार्यक्रम ज्वालामूखी गाउँपालिकाले परिकल्पना गरेको “शिक्षा, स्वास्थ्य, कृषि, पर्यटन र पूर्वाधारः समृद्ध ज्वालामूखीको मूल आधार” भन्ने दीर्घकालीन सोंच समेतका आधारमा आर्थिक, सामाजिक र साँस्कृतिक रुपमा पछाडि परेका÷पारिएका समुदायहरुलाई उच्च प्राथमिकतामा राख्दै आम गाउँपालिकाबासीको सर्वोपरी हितलाई केन्द्र भागमा राखिएको बताउनुभयो ।

गाउँपालिकाको समग्र विकास तथा सेवा प्रवाहको लागि नवीन र रुपान्तरणकारी योजना तथा कार्यक्रम संचालन गर्नु आजको आवश्यकता रहेको भन्दै अध्यक्ष दनैले गाउँपालिकाको दीर्घकालिन सोचः “शिक्षा, स्वास्थ्य, कृषि, पर्यटन र पूर्वाधार–समृद्ध ज्वालामूखीको मूल आधार” रहेको बताउनुभयो ।

सभामा अध्यक्ष दनैले गाउँपालिकाको सामाजिक, आर्थिक, मानविय विकासमा अभिबृद्धि भई गाउँबासीको जीवनस्तरमा गुणात्मक सुधार हुने पनि बताउनुभयो ।

बजेट विनियोजन गर्दा मूलतः आवश्यकता, सम्भाव्यता, पारदर्शिता, सहभागिता र स्रोत सुनिश्चितताका सिद्धान्तहरु अवलम्वन गरिने उहाँको भनाई थियो।

नीति तथा कार्यक्रममा कृषिमा आधुनिकीकरण र व्यवसायीकरणमा जोड, पूर्वाधार विकास तथा दिगो व्यवस्थापन, शिक्षा क्षेत्रमा गुणात्मक सुधार,सर्वसुलव र गुणस्तरीय स्वास्थ्य सेवा प्रवाह, उत्पादन र उत्पादकत्वमा सुशासन र वित्तिय अनुशासन, खानेपानी, सरसफाई तथा स्वच्छता व्यवस्थापन, आन्तरिक रोजगार प्रवद्र्धनमा जोड, वातावरण संरक्षण र दिगो विकास, लैंगिक तथा सामाजिक समावेशीकरण, सूचना प्रविधिमा आधारित सेवा प्रवाह, विपद् व्यवस्थापन, उद्धार, राहात र पुनस्थापना जस्ता कार्यक्रम समावेश छन्।

गाउँपालिकाले आगामी आर्थिक वर्ष २०८२/८३ का लागि ६४ करोड ८ लाख ९० हजारको बजेट ल्याएको छ ।

आईतबार गाउँसभाको १५ औं अधिवेशन गाउँपालिकाका उपाध्यक्ष धर्म बहादुर अर्यालले आगामी आर्थिक वर्षको आय–व्ययको अनुमान पेस गर्नुभएको हो।

जसमा संघिय समानिकरण अनुदान १२ करोड ७३ लाख, सर्शत अनुदान २२ करोड ३३ लाख, विशेष अनुदान ८५ लाख, समपुरक अनुदान २ करोड ४५ लाख र राजश्व बाँडफाँड ८ करोड ५४ लाख रहेको छ ।

यस्तै प्रदेश तर्फ समानिकरण अनुदान १ करोड ३३ लाख ५ हजार, सर्शत अनुदान २ करोड १८ लाख १३ हजार, विशेष अनुदान ६५ लाख, समपुरक अनुदान २ करोड ७० लाख र राजश्व बाँडफाँड ३ करोड ८ लाख ९४ हजार रहेको छ ।

धादिङको त्रिपुरासुन्दरी गाउँपालिकाले आगामी आर्थिक वर्ष २०८२/८३ का लागि नीति तथा कार्यक्रम र बजेट सार्वजनिक गरेको छ ।

आईतबार गाउँसभाको १७ औं अधिवेशनले नीति तथा कार्यक्रम र बजेट सार्वजनिक गरेको हो ।

गाउँसभामा गाउँपालिका उपाध्यक्ष देवराज धरेलले ६४ करोड ९० लाख बजेट विनियोजन गर्नुभएको हो ।

जसमा संघिय समानिकरण अनुदान १३ करोड १३ लाख, सर्शत अनुदान २४ करोड८ लाख, विशेष अनुदान ६९ लाख, समपुरक अनुदान १ करोड ८७ लाख र राजश्व बाँडफाँड १० करोड ५१ लाख ९६ हजार रहेको छ ।

यस्तै प्रदेश तर्फ समानिकरण अनुदान १ करोड ३३ लाख ९७ हजार, सर्शत अनुदान २ करोड ५७ लाख, विशेष अनुदान ६५ लाख, समपुरक अनुदान १ करोड ७८ लाख र राजश्व बाँडफाँड ३ करोड ३९ लाख ६० हजार रहेको छ ।

गाउँपालिका तर्फ घरजग्गा रजिष्टेन १ करोड, दहत्तर बहत्तर शुल्क १ करोड र बैक मौज्दात १ करोड २७ लाख,रोयल्टी ६० लाख र राजश्व १ करोड ४५ हजार रहेको छ ।

गाउँसभामा गाउँपालिका अध्यक्ष राजु उप्रेतीले कृषि तथा पशु विकास सेवा, पर्यटन क्षेत्र, सहकारी, उद्योग तथा वाणिज्य, संस्कृति प्रवद्धन, शिक्षा, स्वास्थ्य, रोजगारी, लगायतका विषयलाई प्राथमिकतामा राख्दै नीति तथा कार्यक्रम सार्वजनिक गर्नुभएको थियो ।

नीति तथा कार्यक्रम प्रस्तुत गर्दै गाउँपालिका अध्यक्ष उप्रेतीले जनभावनालाई आत्मसात गर्दै शिक्षा, स्वास्थ्य, कृषि र पूर्वाधारमा आधारित विकासलाई अगाडि बढाउने प्रतिबद्धता जनाउनुभयो।

नीति तथा कार्यक्रममा लघु जलविद्युत परियोजना र ग्रामिण तथा नविकरणीय उर्जा प्रवद्र्धनको लागि सम्भाव्यता अध्ययन गरिने, प्रविधिमैत्री पालिका निर्माणको लागि गाउँपालिकाको डिजिटल भिलेज प्रोफाईल निर्माण गर्ने,करको दायरा फराकिलो बनाईने, कर शिक्षा कार्यक्रम सञ्चालन गर्ने जस्ता कार्यक्रम समावेश छन्।

 

धादिङको बेनिघाटरोराङ गाउँपालिका वडा नं. ८ चैलिङमा बाख्रापालन तथा व्यवसायिक योजना तर्जुमा सम्बन्धि दुईदिने तालिम सम्पन्न भएको छ।

तालिममा बेनिघाट रोराङ वडा नं ६,८ र १० का विद्यालयमा अध्ययनरत बालबालिकाका परिवारहरूको आम्दानी वृद्धि गर्न सहयोग गर्ने उद्देश्यले आयोजना गरिएको हो । बाख्रापालनको लागि छनौट भएका २४ घरपरिवारका कृषकहरु सहभागी रहेको तालिममा सहजिकरण शिव भण्डारीले गर्नुभएको थियोे । भण्डारीले कृषकहरुलाई बाख्रापालनको महत्त्व, बाख्राका जात र विशेषता, रोग पहिचान र उपचार, साथै खाद्य व्यवस्थापन जस्ता विषयमा प्रशिक्षण दिनुभएको थियो।

सोमबार सम्पन्न भएको दुई दिने तालिम चाइल्ड फन्ड जापान र प्रयास नेपाल धादिङको साझेदारी तथा बेनिघाटरोराङ गाउँपालिकाको समन्वयद्वारा सञ्चालित शिक्षामा पहुँच सुनिश्चितता परियोजनाको सहयोगमा सम्पन्न भएको हो। सहभागीहरूको व्यवसायिक योजनाको आधारमा आगामी दिनमा बाख्रापालनमा आवश्यक सहयोग गरिने परियोजना प्रबन्धक सत्यालले जानकारी दिनु भयो।

उक्त तालिममा बेनिघाट रोराङमा कार्यरत पशु स्वास्थ प्राविधिक सीता चौधरीले खोर व्यबस्थापन र खोर निर्माणका लागि आवश्यक मापदण्डका बारेमा सहभागी कृषकहरुलाइ जानकारी गराउनु भएको थियो। यसैगरी तालिमकै क्रममा सहभागी कृषकहरूले व्यवसायिक योजना निर्माण गरेका हुन।
बालबालिकाहरुको शैक्षिक सुधारका लागि परिवारको आम्दानी वृद्धि गराउन बालबालिकाका अभिभावकहरुलाई व्यवसाियक योजना बनाएर खोर,घाँस,व्यवस्थापन तथा ब्याडे बोका र बाख्रा र प्राविधिक सेवा उपलब्ध गराईने योजना रहेको प्रयास नेपालका कार्यकारी निर्देशक दामोदर अर्यालले बताउनु भयो ।

कार्यक्रममा वडाध्यक्ष राजकुमार श्रेष्ठ,, परियोजना प्रबन्धक सन्तोषअनुगमन समिती संयोजक कपिलदेव सापकोटा,सत्याल, लेखा तथा प्रशासन अधिकृत राजन रिजाल, फिल्ड कार्यक्रम अधिकृतहरु, कृषक सहित ३४ जनाको उपस्थिति चैलिङबाट फिल्ड कार्यक्रम अधिकृत सुमित्रा चेपाङले जानकारी दिनु भयो ।

पोखरा । श्रीगण्डकी शतकुण्डीय गायत्री कोटीहोम विराट ज्ञान महायज्ञ शनिबार समापन भएको छ ।

६१ दिन लामो कोटीहोममा करिब ४० लाख ५० हजार भक्तजन सहभागी भएको आयोजक मानव सेवा फाउण्डेशनले जनाएको छ ।
कोटीहोममा करिब नौ करोड रुपैयाँ संकलन भएको कोटीहोमका सङ्कल्पकर्ता बालयोगेश्वर श्रीविजय कृष्णमूर्तिजी महाराजले जानकारी दिए ।

कोटीहोमको सबै हिसावकिताव असार भित्रै फरफारक गरिने, पत्रकार सम्मेलन र सार्वजनिक सुनुवाई गरेरै आयव्यय सार्वजनिक गरिने उनले जानकारी दिए ।
संकल्पकर्ता महाराजजीले कोटीहोमको केही आम्दानी मानव सेवा फाउण्डेशन, छोरीको घर र मानव कल्याणमा लगाउने प्रण गरे । संकल्पकर्ता महाराजजीले समापन कार्यक्रममा कोटीहोम सम्पन्न गर्न सघाउने सबैप्रति आभार व्यक्त गरेका छन्।

समापनमा कोटीहोमका सहसंयोजक युवक लामिछानेले मामाघर अनाथ आश्रम बनाउनका लागि पाँच लाख, कोटीहोमका लागि एक लाख २५ हजार रुपैयाँ सहयोग गर्ने घोषणा गरे ।
कोटीहोममा आयोजित रक्तदानमा नौ सय छ युनिट रगत संकलन भएको छ । साथै कोटीहोममा हालसम्मकै ठूलो धनराशि पुरस्कार भएको राष्ट्रिय भजन प्रतियोगिता तथा वक्तृत्वकला भएको थियो ।
जेठ २६ गते पूर्णाहूति भएको हवनमा चार सय ब्राम्हणद्वारा एक करोड ५० लाख हवन भएको थियो ।

कोटीहोममा पाँच सय २५ जनाको आयोजित ब्रतवन्ध, एक सय २० जनाको तुलादान, एक सय ३५ जनाको चौरासी पूजा, एक सय ४६ जनाको नवग्रह शान्ति, १४ जनाको काल सर्प योग पूजा, पाँच जनाको अर्क विवाह, अष्ट महादान चार, पितृको अर्चना ३३, लघु रुद्री पाँच, अति रुद्री १८, विवाह एक, गुन्यू चोली पाँच, लाखवत्ती सेवा २२ अन्य पूजा ४५ जनाले गरेको प्रचारप्रसार संयोजक लोकराज ढकालले जानकारी दिए ।

कोटीहोमको हवन पूर्णाहूतिमा २१ करोड दीप प्रज्ज्वलन गरिएको थियो । कोटीहोम सफल भएको भन्दै पोखराका कृष्णराज अधिकारीले आठ मिनेट २५ सेकेण्ड लामो शंखघोष गरेका थिए भने तालबाराही मन्दिरमा एक हजार आठ नरिवल अर्पण गरिएको थियो ।

हवन कुण्डमा वैशाख १९ गते बिहान ६ बजेर ४५ मिनेटमा विधिवत् रूपमा अग्नि मन्थन, ७ बजेर १५ मिनेटमा यज्ञ कुण्डमा अग्नि प्रवेश, ७ बजेर १९ मिनेटमा अग्निमा समीधा दान र ८ बजेर ५ मिनेटमा अग्नि कुण्डमा आहुति प्रदान गरी शुरु भएको थियो ।
कुण्डमा तीन, तीन जना ब्राम्हणले हरेक दिन भगवती गायत्री मन्त्र विधिबाट हवन गरेका थिए । कोटीहोममा एक सय आठ भागवत महापुराण पाठ परायण, चार वेद पाठ परायण, सप्तचण्डी, अति रुद्री, मन्त्र जपलगायतमा ब्राम्हणले पाठ गरेका थिए ।

प्रचारप्रसार संयोजक ढकालका अनुसार कोटीहोममा भागवत मञ्जरी राधिका दासी, अन्तर्राष्ट्रिय कथा वाचिका देवी प्रतिभा, अनुराधा पाण्डे, व्यासाचार्य प्रशान्त कृष्ण परांकुश, वाचन प्रवीण पं. दिनबन्धु पोखरेल, युवा दार्शनिक चैतन्यकृष्ण महाराजलगायत साधु सन्तले महायज्ञमा कथा वाचन गरेका थिए ।

कोटीहोम पोखरा–१७ स्थित सदाशिवजी सिद्देश्वर हरिहर मन्दिर र स्थानीयको जग्गामा वैशाख १७ देखि जेठ ३१ सम्म सञ्चालन भएको थियो । यसअघि कोटीहोम जेठ २६ गते समापन हुने भनिए पनि भक्तजनको चापका कारण समयावधि थप भई ३१ गतेसम्म सञ्चालन भएको थियो ।

कोटीहोम समापनसँगै भागवत मञ्जरी राधिका दासीको भव्य बिदाई गरिएको छ । दासीले जेठ १७ देखि समापनसम्म श्रीमद्भागवत कथा वाचन गरेकी थिइन् । दासीको बिदाईमा कोटीहोममा सहभागी सबै भावविह्वल भएका थिए ।