धादिङ कारागारमा कैदीबन्दीको निःशुल्क आँखा परीक्षण, ५८ जनाले पाए चश्मा र औषधि
धादिङबेसीस्थित धादिङ कारागारमा रहेका कैदीबन्दीहरूका लागि आज निःशुल्क आँखा परीक्षण गरिएको छ।
भरतपुर आँखा अस्पतालको प्राविधिक सहयोगमा नेत्रज्योति संघ धादिङले आयोजना गरेको उक्त शिविरमार्फत १ सय ८० जनाको आँखा परीक्षण गरिएको हो।
परीक्षणमा सहभागी भएकामध्ये दृष्टि समस्या देखिएका ५८ जनालाई निःशुल्क चश्मा र औषधि वितरण गरिएको छ। त्यस्तै, ४ जनामा मोतियाबिन्दुको समस्या देखिएपछि चिकित्सकहरूले शल्यक्रिया गर्नुपर्ने सिफारिस गरेका छन्।
हाल धादिङ कारागारमा २ सय ४३ जना कैदीबन्दी रहेका छन्। उनीहरूलाई स्वास्थ्य सेवा पहुँच पुर्याउने उद्देश्यले यस्तो स्वास्थ्य शिविर आयोजना गरिएको आयोजकले बताएका छन्।
