धादिङबेसीमा पर्यटन क्षेत्रका विषयमा सरोकारवालाहरु बीच अन्तरक्रिया गरिएको छ ।
बिहिवार बागमती प्रदेश सरकारको संस्कृति तथा पर्यटन मन्त्रालयको आयोजनामा धादिङबेसीमा जिल्लाको पर्यटन क्षेत्रका विषयहरुमा सरोकारवालाहरुबीच छलफल गरिएको हो । अन्तरक्रिया कार्यक्रममा होटल व्यवसायी, होमस्टे व्यवसायी, यातायात व्यवसायीसहित पर्यटन क्षेत्रमा आवद्ध सहभागी व्यक्तिहरुले धादिङ पर्यटनको हिसाबले उत्कृष्ट गन्तव्य भएपनि तीन तहको सरकारबीच समन्वय नहुदा विकास हुन नसकेको बताएका थिए ।
अन्तरक्रियामा उठेका सवालहरुलाई सम्बोधन गर्दै मन्त्रालयका सचिव दिपेन्द्र सुवेदीले प्रदेश भित्रको पर्यटन क्षेत्रको प्रवद्र्धनका लागि सरकारले नीतिगत सुधारलाई प्राथमिकता दिइरहेको जानकारी दिनुभयो।सुवेदीले नीतिगत सुधार पहिलो प्राथमिकता रहेको भन्दै कार्यविधि बनाएर कार्यान्वयनमा लगिने र कार्यविधि तयार भइसकेपछि पर्यटक भित्र्याउने खालका कार्यक्रमहरु ल्याइने बताउनुभयो ।
अन्तरक्रियामा गजुरी गाउँपालिकाका पूर्व उपाध्यक्ष एवं नेकपा एकिकृत समाजवादी पार्टीकी युवा नेता डा. सीता ढुंगानाले संस्कृति र प्रकृति प्रदर्शन गर्ने खालका पर्यटकीय गन्तव्यको संभाव्यता अध्ययन गरी पहिचान गरेर प्रदेश सरकार अघि बढ्नुपर्ने सुझाव दिनुभयो।
कार्यक्रममाहोमस्टे र होटल व्यवसायीहरुले भने स्थानीय स्तरमा दक्ष जनशक्ति नहुँदा व्यवसाय व्यवस्थित बनाउन नसकेको गुनासो गरेका थिए ।
